Tiyak na magbabago na ang buhay ng kaisa-isang masuwerteng lotto bettor na nakakuha ng six digit number combinations ng 6/55 Grand Lotto ng Philippine Charity Sweepstakes Office (PCSO).
Base impormasyon na ipinarating ng PCSO sa Bombo Radyo, isang taga Luzon ang bagong multi-milyonaryo matapos na eksaktong matamaan ang lucky number combinations na 11-16-42-47-31-37.
Ang gantimpala sa ika-86th draw ng Grand Lotto ay ang nakakalulang P741,176,323.20.
Sa buong kasaysayan ng state lottery, sinasabing ito na ang pinakamalaking papremyo na napanalunan ng mananaya.
Nalagpasan na kasi nito ang P347,836,903.20 na premyo noong February 22, 2009 draw ng 6/49 Super Lotto, kung saan dalawa ang masuwerteng nanalo.
Ang Grand Lotto draw ay isinasagawa tuwing Lunes, Miyerkules at Sabado.
Umabot din ng halos anim na buwan bago nahulaan ang Grand Lotto prize na huling napanalunan ng isang taga-Batangas noon pang buwan ng Mayo.
Samantala, sa bahagi naman ng 6/45 Megalotto ang jackpot prize ay umaabot na sa P5,104,884.60 at ang kukumpletong numero para sa naturang premyo ay 31-35-02-16-33 at 43.
Una rito, ipinanalangin ng PCSO na sana ay meron ng manalo grand prize.
Ilang oras bago ang bolahan, inamin ni Ms. Liza gabuyo, assistant general manager for operations ng PCSO na maging sila ay umaasa na sana'y may manalo na rin sa jackpot prize.
Ayon pa kay Gabuyo, wala rin namang problema kung magkaubusan ng ticket sa dahilang marami umano silang stocks sa warehouse at kung maubusan man sa mga ticket outlets ay maaari pa ring makataya sa dahilang puwede maging mano mano na lang pagpasok sa terminal ang numero ng mananaya.
Samantala, dismayado si Eastern Samar Rep. Ben Evardone sa nangyayaring kultura ngayon ng gambling sa bansa dulot ng lotto fever.
Nakakahiya aniya na pinag-uusapan sa bawat sulok ng bansa ang lotto hindi lamang sa mga barberya, lugar ng mayayaman sa Makati City, iskwater area at iba pang sektor, kundi maging sa Kamara, Senado at Malacañang.
Nangangamba siya na baka pati baon ng ilang mga bata ay binabawasan na rin ng ilang magulang para lamang makataya ng lotto.
Binigyang halimbawa rin nito na maging ang panaginip ng mga bata ay kinukulit ng ilang magulang para lamang malaman daw kung ano ang maswerteng lalabas na numero.
Kaya naman ang kanyang panukala na hanggang P500 milyon lamang ang limitasyon ng premyo at pagsomogra ay ilaan na sa sa ibang pangunahing serbisyo.
Ayon naman sa PCSO, ang 30 porsyentong kinikita sa lotto ay itinatabi para sa charity.
http://www.bomboradyo.com/index.php/story-of-the-day/30234-taga-luzon-solo-winner-sa-p741-m-grand-lotto
