Isang Paghanga Nga Lang Ba o …?
Noong una kitang nasilayan
Hindi na naalis sa aking isipan
Ang iyong mukha
Isang kakaibang pakiramdam
Na inakala ko noo’y
Hindi ko na mararamdamang muli
Ito ang kauna-unahang pagkakataon na
May isang taong tulad mo
Ang pumukaw ng aking atensyon
Sa dinarami-raming taong pwede kong magustuhan
Ikaw pa ang pinili ng puso ko
Bakit ganoon?
‘Pag tuwing ikaw ay nakakasalubong
Gumagaan ang aking pakiramdam
At para bang kinukumpleto mo ang araw ko
Gustuhin ko mang makipagkaibigan sa ‘yo
Masyadong mailap ang pagkakataon sa akin
Nais ko sanang makilala kang mabuti
‘Yung bang nasasamahan kita sa saya’t lungkot mo
Hindi naman ako umaasa ng anumang kapalit
Nakakalungkot lang
Dahil alam kong hindi mangyayari ‘yun
Hay… Ano ba ‘tong nararamdaman ko para sa ‘yo?
Isang paghanga nga lang ba o mahal na kita?
Hanggang pangarap na lang ba talaga?
Sana… Sana… Sana…