Manager ng Wowowee girls mananagot sa ABS
Bandera First Posted 07:30:00 03/03/2010 Filed Under:
Manager ng Wowowee girls mananagot sa ABS
MALINAW ang kuwentong nakarating sa amin tungkol kina Luningning, Milagring at Mariposa, ang tatlong dancers ng ASF, na nagdesisyon nang umalis sa Wowowee.
Walang sumulot sa kanila, wala rin silang planong irekomenda ang kanilang mga sarili sa ibang grupo, sa ngayon ay bakanteng-bakante ang tatlo.
Nasa kani-kaniyang bahay lang sila ngayon, nagmumuni-muni, dahil hindi naman ganu’n kasimple ang pinagkasunduan nilang gawin. Napakasakit sa kanila ang naturang hakbang, napamahal na sa kanila ang noontime show at ‘yun ang nagbigay sa kanila ng pangalan at popularidad na tinatamasa nila ngayon, kaya siguradong sa pakikipaglaban nila ng prinsipyo ay may kakambal na matinding kalungkutan ‘yun.
Hindi biro ang pagtalikod sa isang programang itinuring na nilang pangalawang tahanan, umaga pa lang ay nandu’n na silang lahat para sa kanilang rehearsal, hapon na sila naghihiwa-hiwalay pagkatapos ng Wowowee. Matindi ang bonding ng grupo, para na silang magkakapatid kung magturingan sa loob nang mahabang panahon, kaya parang nakikinita na namin kung gaano kalungkot ngayon sina Luningning, Mariposa at Milagring.
Pero hindi lang naman sila ang nakakaramdam ng lungkot, maging ang kanilang mga kasamahang dancers ay nabigla at nalungkot din sa biglaan nilang pag-alis, propesyonal lang talaga ang mga ito kaya hindi ‘yun mahahalata kapag sumasalang na sila sa Wowowee.
Kuryente ang kuwentong kumalat na lilipat daw sa kabilang noontime show ang tatlo, kahit sa panaginip lang ay hindi ‘yun pumasok sa kanilang isip, talagang kailangan lang nilang panindigan ang kanilang ipinaglalaban, ang hindi maayos na pamamahala ni Anna Feliciano sa kanilang lahat.
Hindi lang naman ang kanilang sarili ang ipinaglaban ng tatlo, mabibiyayaan din sa kanilang ginawa ang iba pang ASF Dancers na naiwan sa programa, sila pa nga kung tutuusin ang nagsakripisyo ng kanilang karera para sa ikabubuti ng buong grupo. Sa ngayon ay sumasailalim ang kanilang manager sa isang proseso ng tanungan, natural lang na bigyan ng panahon ng mga ehekutibo ng network ang nangyari, dahil malaking kasiraan ‘yun sa kanila.
Nakausap na namin si Willie Revillame tungkol sa senaryo, malungkot ang TV host nang makausap namin, napalapit na kasi sa kanya ang tatlong dancers na ngayo’y hindi na bahagi ng kanyang programa.
“Wala pa akong masasabi sa ngayon, kailangan ko pa munang makausap ang magkabilang panig. Sa ngayon, nalulungkot siyempre ako sa pagkawala ng tatlo, nakasanayan ko na kasi silang makita sa araw-araw, kaya nakakapanibago na wala na sila ngayon.
“Kailangan kong intindihin ang ginawa nila, hindi naman sila aalis kung hindi talaga mabigat ang dahilan. Nakakalungkot lang, dahil kahit sa ibang bansa, kasa-kasama ko sila, naninibago ako,†malungkot na pahayag ng aktor-TV host.
Sa pagkakaalam namin ay tututukang mabuti ng produksiyon ang ginawang desisyon nina Luningning, Mariposa at Milagring, nabigla ang staff sa aksiyon ng tatlo, kailangan nilang kausapin nang masinsinan ngayon si Anna Feliciano para malinawan ang problema. Sa pagkakaalam din namin ay kay Anna ibinibigay ng Wowowee ang suweldo ng lahat ng dancers, sa kanilang manager nakapangalan ang tseke, kaya si Anna talaga ang dapat managot sa mga nagaganap na alingasngas sa grupo.
Kapag napatunayan kaya ng network na nagkamali si Anna Feliciano ay magkaroon ng hakbang para tanggalin na siya sa noontime show?
Kung matatandaan ay ilang staff na ng programa ang natanggal noon nang dahil sa ganyan ding problema, kaya hindi malayong palitan na rin ang choreographer ng Wowowee, kapag napatunayang nagkasala nga si Anna Feliciano.
